პარლამენტის თავმჯდომარე ირაკლი კობახიძე ვარაუდობს, რომ მთავრობის რეორგანიზაციასთან დაკავშირებით საბოლოო გადაწყვეტილებას უმრავლესობა უახლოეს ორ დღეში მიიღებს.
როგორც კობახიძემ ჟურნალისტებს განუცხადა, ამ ეტაპზე პოზიციები 13-დან 10 სამინისტრომდე შემცირებაზეა შეჯერებული. კობახიძის თქმით, უმრავლესობასა და პრემიერს შორის კონსულტაციები დღესაცაა დაგეგმილი.
"საუბარია 14 მინისტრის არსებობის ნაცვლად 11 მინისტრის არსებობაზე. შესაბამისად, მთავრობაში 13 სამინისტროს ნაცვლად იქნება 10 სამინისტრო. ეს არის ამ ეტაპზე ჩვენი კონსულტაციების შედეგი. ეს კონსულტაციები გრძელდება და საბოლოოდ ხვალ-ზეგ გამოიკვეთება გუნდში რეორგანიზაციასთან დაკავშირებით პოზიცია. დღეს გვექნება უმრავლესობასა და პრემიერ-მინისტრს შეხვედრა და უახლოეს ორ დღეში ალბათ უმრავლესობაში საბოლოო გადაწყვეტილებას მივიღებთ მთავრობის რეორგანიზაციასთან დაკავშირებით", - განაცხადა ირაკლი კობახიძემ.