აშშ-ის პრეზიდენტის, დონალდ ტრამპის განცხადებით, სინგაპურში კიმ ჩენ ინთან მიღწეული შეთანხმების რეალიზება უკვე ხდება, რაც კორეის ნახევარკუნძულის დენუკლეარიზაციას უკავშირდება. ამის შესახებ თეთრი სახლის ლიდერმა ამერიკული კომპანიების ხელმძღვანელებთან შეხვედრაზე განაცხადა.

„პროცესი უკვე დაიწყო და ჩრდილოეთ კორეასთან შემდგომ მოლაპარაკებებს ვაგრძელებთ“, - განაცხადა ტრამპმა.

მისივე თქმით, უკვე მნიშვნელოვანია, რომ იაპონიის თავზე აღარ დაფრინავენ ჩრდილოკორეული რაკეტები და აღარ ხდება ბირთვული გამოცდები.

„ბოლო შვიდი თვის განმავლობაში არ განხორციელებულა არც ერთი სარაკეტო გამოცდა. ისინი ახორციელებენ თავისი ბირთვული და სარაკეტო პოლიგონების დემონტაჟს. ლიკვიდირებულია პოლიგონი, სადაც ბალისტიკური რაკეტების გამოცდა მიმდინარეობდა“, - აღნიშნა ტრამპმა.

მისივე თქმით, ასევე მნიშვნელოვანია, რომ მას ჩრდილოეთ კორეის ლიდერთან კარგი ურთიერთობა ჩამოუყალიბდა.

„ის ჭკვიანი, ხისტი მომლაპარაკებელია. ის ხედავს, რომ ჩრდილოეთ კორეას შეიძლება ჰქონდეს საუკეთესო მომავალი. ჩვენ გვინდა, რომ ჩრდილოეთ კორეას არ ჰქონდეს ბირთვული იარაღი. ახლა მოვლენები იმაზე სწრაფად ვითარდება, ვიდრე ეს შეიძლებოდა ვინმეს წარმოედგინა. მანამდე კი, ვიდრე მე ამირჩევდნენ პრეზიდენტად, იქმნებოდა შთაბეჭდილება, რომ ჩრდილოეთ კორეასთან ომში ჩაბმას ვაპირებდით, რაც 50 მილიონი ადამიანის სიკვდილს გამოიწვევდა“, - განაცხადა დონალდ ტრამპმა.