უნგრეთს ჯერ არ მიუღია გადაწყვეტილება ნატო-ს სამიტზე უკრაინისათვის ასპირანტი ქვეყნის სტატუსის დადასტურების ბლოკირებაზე. ამის შესახებ უნგრეთის საგარეო საქმეთა მინისტრმა პეტერ სიიარტომ უკრაინული გამოცემა Европейская Правда-სთვის მიცემულ ინტერვიუში განაცხადა.
უნგრეთის საგარეო უწყების ხელმძღვანელის თქმით, ამ საკითხზე მოლაპარაკებები მიმდინარეობს.
„ამ საკითხთან დაკავშირებით მოლაპარაკებები მიმდინარეობს ბრიუსელში. ვნახოთ, თუ რა შედეგს გამოიღებს. გარდა ამისა, ჩვენ ასევე გავითვალისწინებთ იმას თუ როგორ დასრულდება უკრაინის განათლების მინისტრსა და უნგრულ უმცირესობას შორის კონსულტაციების მორიგი რაუნდი, რომელიც ივლისის დასაწყისისთვისაა დაგეგმილი“, - განაცხადა უნგრეთის საგარეო საქმეთა მინისტრმა.
ურთიერთობები ბუდაპეშტსა და კიევს შორის უკრაინის განათლების შესახებ კანონის განხილვის ფონზე გამწვავდა, რომელიც ამცირებს სხვა ენებზე სწავლის შესაძლებლობას. უნგრეთის მთავრობაში განაცხადეს, რომ კანონი ეროვნული უმცირესობების უფლებებს არღვევს, რომელთა შორის ბევრი ეთნიკური უნგრელია.