დევნილთა და განსახლების სამინისტროდან სოციალური კომპონენტი გადავა ჯანდაცვაში, ხოლო თავად სახელი შერიგების სამინისტროში, - ამის შესახებ საპარლამენტო უმრავლესობის წევრმა, დავით ჭიჭინაძემ მთავრობის სტრუქტურული ცვლილებების საკითხზე კომენტირებისას განაცხადა.
მისივე თქმით, სტრუქტურულ ცვლილებებთან დაკავშირებით შეთანხმება უკვე მიღწეულია და ყველაფერი ისე იქნება, როგორც ითქვა, ანუ გაერთიანდებიან იუსტიციის და სასჯელაღსრულების სამინისტროები, სპორტის, კულტურისა და განათლების სამინისტროები, ხოლო დევნილთა და განსახლების სამინისტრო კი შერიგების და სამოქალაქო თანასწორობის საკითხებში სახელმწიფო მინისტრის აპარატს შეუერთდება.
"იყო აზრთა სხვადასხვაობა, თუმცა პრემიერ-მინისტრს თავისი არგუმენტები გააჩნია და უმრავლესობამ გაიზიარა ისინი. სამშენებლო ნაწილი წავა ინფრასტრუქტურაში და ეს ძალიან მნიშვნელოვანია. დევნილების ნაწილი სოციალურ ნაწილში გადავა ჯანდაცვაში, ხოლო თავად სახელი წავა შერიგებაში, რათა სტატუსი არ დაიკარგოს. ყველაზე დიდი კითხვები გამოიწვია განათლება-კულტურის შერწყმამ. ორივე მხარეს მოჰყავს არგუმენტები და საკმაოდ წონადი არგუმენტები გააჩნიათ და ალბათ, უფრო სესიაზე გამოჩნდება ეს ყველაფერი", - განაცხადა დავით ჭიჭინაძემ.