შინაგან საქმეთა სამინისტროს გამოძიების მაქსიმალური შედეგი უნდა იყოს ის, რომ დაადგინოს მკვლელობაში მონაწილე ყველა პირის ვინაობა, - ამის შესახებ სახალხო დამცველმა, ნინო ლომჯარიამ ხორავას ქუჩაზე მომხდარი მკვლელობის საქმესთან დაკავშირებით ჟურნალისტებს განუცხადა. მისი თქმით, გამოძიება ასევე უნდა წარიმართოს იმ პირთა გამოსავლენადაც, რომლებმაც შესაძლოა გავლენა მოახდინეს გამოძიების მიმდინარეობაზე.
„ სასამართლო განაჩენმა დაადასტურა, რომ გამოძიებამ ვერ უზრუნველყო მკვლელობაში მონაწილე ყველა პირის იდენტიფიცირება. გარდა ამისა, ვფიქრობთ, რომ გამოძიება უნდა წარიმართოს იმ მიმართულებითაც, რომ გამოვლინდეს, რატომ ვერ უზრუნველყო გამოძიებამ შესაბამისი მონაწილეების გამოვლენა. იყო ეს განზრახვა, დაუდევრობა თუ ა.შ. უნდა წარიმართოს გამოძიება იმ პირთა გამოსავლენად, რომლებმაც შესაძლოა ზეგავლენა მოახდინეს გამოძიების მიმდინარეობაზე",- განაცხადა ნინო ლომჯრიამ.
შეგახსენებთ, რომ ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.