განათლების, მეცნიერებისა და კულტურის კომიტეტის თავმჯდომარე მარიამ ჯაში და განათლებისა და მეცნიერების მინისტრი მიხეილ ჩხენკელი 25-26 ივნისს პირველი ოფიციალური ვიზიტით ეწვევიან ბირთვული კვლევების ევროპულ ცენტრს (CERN), რომელიც მსოფლიო მასშტაბით მაღალი ენერგიის ფიზიკაში წამყვანი სამეცნიერო-კვლევითი ცენტრია.

როგორც „ინტერპრესნიუსს“ საქართველოს პარლამენტიდან აცნობეს, ჟენევაში მარიამ ჯაში და მიხეილ ჩხენკელი შეხვდებიან CERN-ის გენერალურ დირექტორს, ფაბიოლა გიანოტის, დირექტორთა საბჭოს წევრებს და იქ მოღვაწე ქართველ მეცნიერებს, სადაც CERN-თან ურთიერთობის გაღრმავებასა და ორგანიზაციაში საქართველოს ასოცირებული წევრობის შესაძლებლობაზე ისაუბრებენ.

მარიამ ჯაში და მიხეილ ჩხენკელი დეტალურად გაეცნობიან CERN-ში ქართველი მეცნიერების ჩართულობით მიმდინარე ყველა ძირითად ექსპერიმენტალურ პროექტს, მათ შორის „ატლასის“ ექსპერიმენტის მიმდინარეობას.

„ჩვენ ვისაუბრებთ CERN-თან ურთიერთობის გაღრმავებაზე, ქართველი სტუდენტებისა და სკოლის მოსწავლეების CERN-ში ვიზიტების მნიშვნელობაზე. ასევე, საუბარი შეეხება ორგანიზაციაში საქართველოს ასოცირებული წევრობის სამომავლო პერსპექტივას, რაც ქართველ მეცნიერებს საშუალებას მისცემს, უკვე საქართველოს სახელით ჩაერთონ მნიშვნელოვან საერთაშორისო კვლევებში“, - აცხადებს მარიამ ჯაში.