რუსეთის პრეზიდენტ ვლადიმერ პუტინსა და აშშ-ს პრეზიდენტ დონალდ ტრამპს შორის შესაძლო შეხვედრა რუსეთთან მიმართებაში ნატო-ს პოლიტიკას შეესაბამება.
ამის შესახებ ნატო-ს გენერალურმა მდივანმა იენს სტოლტენბერგმა განაცხადა.
„ტრამპის და პუტინის შეხვედრა ნატო-ს პოლიტიკის შესაბამისობაში იქნება, ვინაიდან ნატო რუსეთთან დიალოგს უჭერს მხარს“, - განაცხადა ნატო-ს გენერალურმა მდივანმა.
იენს სტოლტენბერგმა ხაზგასმით აღნიშნა, რომ ნატო რუსეთთან მიმართებაში ორმაგ მიდგომას ავითარებს, რაც შეკავებასა და დიალოგს მოიცავს.
„ეს დიალოგის ნაწილი იქნება, რომელსაც ადგილი აქვს ნატო-სა და რუსეთს შორის“, - დასძინა იენს სტოლტენბერგმა.
9 ივნისს რუსეთის პრეზიდენტის პრესმდივანმა დიმიტრი პესკოვმა განაცხადა, რომ ტრამპსა და პუტინს შორის სატელეფონო საუბრისას მხარეები განიხილავდნენ ვენაში ორმხრივი შეხვედრის გამართვის შესაძლებლობას. 16 ივნისს კი, ავსტრიის კანცლერმა სებასტიან კურცმა დაადასტურა, რომ მან მხარეებს შეხვედრის გამართვა შესთავაზა.