წეროვანში მომხდარი ავარიის გამო, “ჯეო ჰოსპიტალსში“ მოთავსებულ ერთ-ერთ პაციენტს, რომლის მდგომარეობაც, სხვა პაციენტებთან შედარებით მძიმეა, ოპერაცია უკვე ჩაუტარდა.

როგორც „ინტერპრესნიუსს“ კლინიკის დირექტორმა მაკა თავხელიძემ განუცხადა, პაციენტების ჯანმრთელობის მდგომარეობა სხვადასხვა სახისაა, თუმცა ყველა მათგანი საჭიროებს სტაციონარულ მკურნალობასა და დაკვირვებას, რათა ჯანმრთელობის მდგომარეობის გართულების შემთხვევაში, დროულად მოხდეს დახმარების გაწევა.

„ამჟამად ჩვენს საავადმყოფოში 9 პაციენტია მოთავსებული. მათი ჯანმრთელობის მდგომარეობა სხვადასხვა სახისაა. ერთი პაციენტის მდგომარეობა შედარებით მძიმეა, რომელსაც ჩაუტარდა ოპერაცია, დანარჩენების ჯანმრთელობის მდგომარეობა საშუალო სიმძიმისაა, თუმცა საჭიროებენ სტაციონარულ მკურნალობასა და დაკვირვებას, ვინაიდან შესაძლოა რაიმე გართულება მოხდეს“, - აღნიშნა მაკა თავხელიძემ.

თავდაპირველად „ჯეო ჰოსპიტალსში“ ავარიის შედეგად დაშავებული 8 ადამიანი მოათავსეს. მოგვიანებით კი, ერთი პაციენტი გადაიყვანეს, რომელსაც დროული სამედიცინო დახმარება ჩაუტარდა. დაშავებულებს შორის ერთი მცირეწლოვანია, თუმცა მისი მდგომარეობა სტაბილურია. კიდევ ერთი მცირეწლოვანი მოთავსებულია მცხეთის ახალ სამედიცინო ცენტრში, რომლის მდგომარეობაც ასევე სტაბილურია. „ახალ სამედიცინო ცენტრში“ ავარიის შედეგად დაშავებული კიდევ 10 ადამიანია მოთავსებული, რომლებიც ექიმთა მუდმივი მეთვალყურეობის ქვეშ რჩებიან.

წეროვანში დღეს მომხდარი ავარიის შედეგად გარდაიცვალა 30 წლის მამაკაცი.

ავარიის დროს ტრაილერი მიკროავტობუსს შეეჯახა. მომხდართან დაკავშირებით მიმდინარეობს გამოძიება.