თურქეთში საგანგებო მდგომარეობის გაუქმება ბერლინსა და ანკარას შორის ურთიერთობის გაუმჯობესებისკენ გადადგმული ნაბიჯი იქნებოდა, - ამის შესახებ გერმანიის საგარეო საქმეთა მინისტრმა ჰაიკო მაასმა განაცხადა.

„ჩვენ ვაკვირდებოდით ამ არჩევნებს დიდი ინტერესით, ვინაიდან თურქეთთან მჭიდრო ურთიერთობები გვაქვს, გერმანიაში თურქეთის მოქალაქეების მნიშვნელოვანი ნაწილი ცხოვრობს. ჩვენ პატივს ვცემთ თურქი ამომრჩევლების მიერ დაფიქსირებულ ნებისმიერ შედეგს. მივიჩნევ, რომ თურქეთსა და გერმანიას შორის ურთიერთობების გაუმჯობესების მიზნით შემდეგი ნაბიჯი თურქეთში საგანგებო მდგომარეობის გაუქმება უნდა იყოს“, - განაცხადა გერმანიის საგარეო უწყების ხელმძღვანელმა.

მისივე თქმით, ეს დაახლოების პირველი, მაგრამ მნიშვნელოვანი სიგნალი იქნება.

გუშინ თურქეთში გამართულ რიგგარეშე საპრეზიდენტო და საპარლამენტო არჩევნებზე რეჯეფ თაიფ ერდოღანმა არჩევნებში მონაწილეთა ხმების 52,5% მიიღო, ხოლო მისმა „სამართლიანობისა და განვითარების“ პარტიამ“ - 42,5%.