იუსტიციის უმაღლესი საბჭოს გადაწყვეტილებით, უვადო მოსამართლის თანამდებობაზე 7 კანდიდატი გამწესდა. კენჭისყრის პროცედურა დღევანდელ სხდომაზე გაიმართა. უვადო მოსამართლის თანამდებობაზე გამწესდნენ ის მოსამართლეები, რომლებსაც სამწლიანი გამოსაცდელი ვადა მიმდინარე წლის 1-ელ აგვისტოს ეწურებათ.

ნანა აფციაურის თბილისის საქალაქო სასამართლოს ადმინისტრაციულ საქმეთა კოლეგიის მოსამართლედ გამწესებას ანა დოლიძის გარდა საბჭოს ყველა წევრმა დაუჭირა მხარი. ეკატერინე კულუაშვილის საქალქო სასამართლოს სისხლის სამართლის საქმეთა, საგამოძიებო წინასასამართლო სხდომისა და არსებითი კოლეგიის თანამდებობაზე უვადოდ გამწესებას საბჭოს 13-მა წევრმა დაუჭირა მხარი.

ამავე პოზიციაზე 13 ხმით უვადოდ გამწესდა დავით კურტანიძე. წინააღმდეგი არავინ იყო. ქეთევან მინაშვილი თბილისის საქალაქო სასამართლოში ადმინისტრაციულ საქმეთა კოლეგიის უვადო მოსამართლის თანამდებობაზე გამწესდა. მას მხარი ანა დოლიძის გარდა საბჭოს ყველა წევრმა დაუჭირა.

თამარ ოქროპირიძე საქალაქო სასამართლოს ადმინისტრაციულ საქმეთა კოლეგიის მოსამართლის თანამდებობაზე უვადოდ 13 ხმით გამწესდა. წინააღმდეგი არავინ იყო. ამავე თანამდებობაზე 13 ხმით უვადოდ გამწესდა ანა ჩხეტია. წინააღმდეგი არავინ იყო.

საქალაქო სასამართლოს ადმინისტრაციულ საქმეთა კოლეგიის მოსამართლის თანამდებობაზე 12 ხმით უვადოდ გამწესდა დავით წერეთელი. გასაუბრებას არ ესწრებოდა ანა დოლიძე და ამ მოტივით კენჭის პროცესში მას მონაწილეობა არ მიუღია.

შვიდმა კანდიდატმა გასაუბრების პროცედურა იუსტიციის უმაღლეს საბჭოში გასულ სხდომაზე გაიარა. უვადო მოსამართლეობის მსურველი კანდიდატები ორი მთავარი კრიტერიუმის - კეთილსინდისიერებისა და კომპეტენტურობის მიხედვით ფასდება.