დანაშაულის დამადასტურებელი გარემოებები არ გამოვლენილა იმ ორ პირთან მიმართებაში, ვიზეც ზაზა სარალიძე მიუთითებს, რომ მონაწილეობდნენ მისი შვილის დაჭრაში, - ამის შესახებ საქმის პროკურორმა ზვიად ფხაკაძემ ხორავას ქუჩაზე მომხდარი მკვლელობის დროებითი საგამოძიებო კომისიის სხდომაზე მამუკა მდინარაძის კითხვის პასუხად განაცხადა.
მდინარაძე დაინტერესდა პროკურორისგან, რატომ არ მიმდინარეობს დამატებითი საგამოძიებო მოქმედებები იმ ორ ადამიანთან მიმართებაში, ვიზეც ზაზა სარალიძეს ეჭვი აქვს.
„თუ გამოვლინდებოდა რამე გარემოება გამოძიების სტადიაზე, რომ ვთქვათ ბატონი ზაზა სარალიძის მიერ დასახელებული პირები მ.კ. და გ.მ. რამე შემხებლობაში არიან მკვლელობის ფაქტთან დაკავშირებით, გარდა იმ მოცემულობისა, რაც მათ გამოძიების სტადიაზე მისცეს და სასამართლოში დააფიქსირეს, მყისიერად იქნებოდა რეაგირება. ეს არაერთხელ განვუმარტე ზაზას. ეს საქმე ქალაქ თბილისის პოლიციის დეპარტამენტში იყო გამოძიებაში. ეს გარემოება არ გამოვლენილა, თუმცა ახლა ცენტრალური კრიმინალური პოლიციის დეპარტამენტი იძიებს და იქ გამოვლინდა თუ არა, ეს უკვე არ ვიცი“, - აღნიშნა ზვიად ფხაკაძემ.
მამუკა მდინარაძე ასევე დაინტერესდა, თუ როგორ აღმოჩნდა ერთ-ერთი იმ პირთაგანის ტანსაცმელზე გარდაცვლილი დავით სარალიძის სისხლის კვალი, რომელზეც ზაზა სარალიძე აცხადებს, რომ მონაწილეობდა მოზარდის მკვლელობაში. პროკურორ ზვიად ფხაკაძის განმარტებით, გ.მ.-მ განაცხადა, რომ მას შეხება ჰქონდა სარალიძესთან. „მან ასევე აღნიშნა, რომ მან ეს სისხლი აღიქვა, როგორც საკუთარი სისხლი, რომელიც მას მოსდიოდა ზურგის არიდან“, - განაცხადა ფხაკაძემ.