ხორავას ქუჩაზე მომხდარი მკვლელობის შემსწავლელი პარლამენტის საგამოძიებო კომისიის სხდომა ხვალ განახლდება

ხორავას ქუჩაზე მომხდარი დანაშაულის შედეგად ორი ახალგაზრდის მკვლელობის შემსწავლელი საქართველოს პარლამენტის დროებითი საგამოძიებო კომისიის სხდომა ხვალ კვლავ კახა სირაძის და ზვიად ფხაკაძის მოსმენით განახლდება.

ქალაქ თბილისის პროკურატურის შინაგან საქმეთა სამინისტროს ორგანოებში გამოძიების საპროცესო ხელმძღვანელობის განყოფილების უფროს ზვიად ფხაკაძეს და შსს-ს თბილისის პოლიციის დეპარტამენტის დეტექტივების სამმართველოს პირველი განყოფილების უფროსს კახა სირაძეს დღეს დაახლოებით 8 საათის განმავლობაში უსმენდნენ, თუმცა კომისიის წევრებს მათთან კითხვები კიდევ დარჩათ.

ხვალინდელ სხდომაზე მხოლოდ ფხაკაძისა და სირაძის მოსმენა, ასევე, მომავალი სხდომების დღის წესრიგის დამტკიცება იგეგმება. პარლამენტის საგამოძიებო კომისიის სხდომა ხვალ, 15:00 საათზე განახლდება.