საქართველოს საგარეო საქმეთა მინისტრმა, დავით ზალკალიანმა თურქეთის საგარეო საქმეთა მინისტრთან, მევლუდ ჩავუშოღლუსთან სატელეფონო საუბარი გამართა. როგორც „ინტერპრესნიუსს“ საგარეო საქმეთა სამინისტროს პრესსამსახურიდან აცნობეს, დავით ზალკალიანმა თურქ კოლეგას ქვეყანაში საერთო არჩევნების წარმატებული ჩატარება მიულოცა და თურქეთის საზოგადოების გამოხატული მხარდაჭერა აღნიშნა.

თავის მხრივ, მევლუდ ჩავუშოღლუმ მიულოცა საქართველოს საგარეო საქმეთა მინისტრს მაღალ თანამდებობაზე დანიშვნა და მომავალში ნაყოფიერი თანამშრომლობის იმედი გამოხატა.

თურქეთის მხარემ ხაზი გაუსვა საქართველოს სუვერენიტეტისა და ტერიტორიული მთლიანობის და საქართველოს ევროპული და ევრო-ატლანტიკური ინტეგრაციის მიმართ მხარდაჭერა და კმაყოფილებით აღნიშნა ორ ქვეყანას შორის არსებული სტრატეგიული პარტნიორობა.

მხარეებმა გამოხატეს იმედი, რომ ურთიერთსასარგებლო თანამშრომლობა წარმატებულად განვითარდება როგორც ორმხრივ, ასევე მრავალმხრივ რეგიონალურ და საერთაშორისო ფორმატებში.

სატელეფონო საუბარი ქართული მხარის ინიციატივით შედგა.