ესპანეთში ე.წ. სომხური დანაშაულებრივი დაჯგუფების წინააღმდეგ ფართომასშტაბიანი ოპერაცია ტარდება, - ამის შესახებ ინფორმაციას კატალონიის პოლიცია ავრცელებს.

„ეროვნულ პოლიციასთან ერთად ოპერაციას ვატარებთ ე.წ.სომხური დაჯგუფების წინააღმდეგ. აღნიშნული დაჯგუფების საქმიანობა უკავშირდება ნარკოტრაფიკს, იარაღით ვაჭრობას, თამბაქოს კონტრაბანდას, ფულის გათეთრებას და საკუთრებასთან დაკავშირებულ სხვა დანაშაულებს ევროპის მასშტაბით“, - განაცხადეს კატალონიის პოლიციის პრესსამსახურში.

ესპანური მედიის ინფორმაციით, ოპერაციის ფარგლებში სამართალდამცველები ჩხრეკას ახორციელებენ ბარსელონაში, მადრიდში, ვალენსიაში, ალიკანტეში, ალბასეტეში და სხვა ქალაქებში.

არსებული ინფორმაციით, იგეგმება 100-მდე ადამიანის დაკავება.

თავის მხრივ, ესპანური გამოცემა El País თავის წყაროზე დაყრდნობით იუწყება, რომ ეს ოპერაცია წერტილს დაუსვამს ძმები შუშანაშვილების და ე.წ. კანონიერი ქურდის ერიკ ჯაგინიანის დაჯგუფების საქმიანობას.