მინისტრთა კაბინეტის მოქმედი წევრები აცხადებენ, რომ მთავრობის განახლებულ შემადგენლობას პრემიერ-მინისტრი დაასახელებს. რეგიონული განვითარებისა და ინფრასტრუქტურის მინისტრის, მაია ცქიტიშვილის განცხადებით, ახალი გუნდი მას შემდეგ გახდება ცნობილი, რაც პარლამენტი სტრუქტურულ ცვლილებებს დაამტკიცებს.
“ჩემს პერსონასთან დაკავშირებით იმდენი ვერსია მაქვს მოსმენილი, ამ დრომდე ვერც ერთი ვერ მართლდება. ახალი გუნდი იქნება წარმოდგენილი მას შემდეგ, რაც პარლამენტი სტრუქტურულ ცვლილებებს დაამტკიცებს“, - განაცხადა ცქიტიშვილმა.
შერიგებისა და სამოქალაქო თანასწორობის საკითხებში სახელმწიფო მინისტრის, ქეთევან ციხელაშვილის განცხადებით კი, ამ ეტაპზე მთავრობის განახლებული შემადგენლობის შესახებ ვერაფერს იტყვის.
“ვერაფერს გეტყვით. პრემიერი თავად წარადგენს კაბინეტის ახალ შემადგენლობას“, - განაცხადა ციხელაშვილმა.