საქართველოს პრემიერ-მინისტრსა და თურქეთის რესპუბლიკის პრემიერ-მინისტრს შორის სატელეფონო საუბარი შედგა, - ამის შესახებ „ინტერპრესნიუსს“ მთავრობის ადმინისტრაციის პრესსამსახურიდან აცნობეს.

მათი ინფორმაციით, მამუკა ბახტაძემ თურქ კოლეგას არჩევნების წარმატებით ჩატარება მიულოცა და აღნიშნა, რომ თურქეთი საქართველოს მნიშვნელოვანი პარტნიორია. საუბარი შეეხო რეგიონულ პროექტებს და ორმხრივი თანამშრომლობის კიდევ უფრო განვითარებას.

პრესსამსახურის ცნობით, თურქეთის პრემიერმა, ბინალი ილდირიმმა საქართველოს სუვერენიტეტისა და ტერიტორიული მთლიანობისადმი და საქართველოს ევროპული და ევროატლანტიკური ინტეგრაციისადმი მტკიცე მხარდაჭერა დაადასტურა. მხარეებმა სტრატეგიული პარტნიორობის გაღრმავებისა და მრავალმხრივ ფორმატებში წარმატებული თანამშრომლობის გაგრძელების იმედი გამოთქვეს.