ევროკავშირი ალბანეთის და მაკედონიის ევროკავშირში გაწევრიანებაზე მოლაპარაკებებს 2019 წლის ივნისში დაიწყებს

ევროკავშირი ალბანეთთან და მაკედონიასთან ამ ქვეყნების ევროკავშირში გაწევრიანების შესახებ მოლაპარაკებებს 2019 წლის ივნისში დაიწყებს. ამის შესახებ ევროკავშირის საბჭოში, ევროკავშირის წევრი ქვეყნების შს მინისტრების სხდომის დამთავრების შემდეგ განაცხადეს.

„ევროკავშირის საბჭომ გადაწყვეტილება მიიღო ალბანეთისა და მაკედონიის ევროკავშირში გაწევრიანების თაობაზე მოლაპარაკებები 2019 წლის ივნისში დაიწყოს“, - ნათქვამია განცხადებაში.

ევროკავშირის საკითხებში ავსტრიის მინისტრმა გერნოტ ბლიუმელმა განაცხადა, რომ მოლაპარაკებების პროცესი მხოლოდ იმ შემთხვევაში დაიწყება, თუ ალბანეთი და მაკედონია გარკვეულ პირობებს შეასრულებენ.

„ჩვენ ევროკომისიას თხოვნით მივმართეთ მოლაპარაკებების პროცესი გახსნან გაისად, თუმცა ეს გარკვეული პირობებით უნდა მოხდეს“, - აღნიშნა მან.

ამჟამად ევროკავშირში გაწევრიანების კანდიდატები არიან სერბეთი, მონტენეგრო, თურქეთი, ალბანეთი და მაკედონია. ბრიუსელი ჯერ არ ასახელებს ამ ქვეყნების ევროკავშირში გაწევრიანების ზუსტ ვადებს.