აშშ და რუსეთის პრეზიდენტების შესაძლო შეხვედრის ადგილად ფინეთის დედაქალაქი ჰელსინკი განიხილება. ამის შესახებ ინფორმაციას საინფორმაციო სააგენტო Reuters წყაროზე დაყრდნობით ავრცელებს.

Reuters-ის წყაროს ინფორმაციით, ამ ეტაპზე ჰელსინკი ყველაზე სავარაუდო ვარიანტია, თუმცა საბოლოო გადაწყვეტილება ორმხრივი კონსულტაციების შედეგად იქნება მიღებული. აღსანიშნავია, რომ დღეს ვიზიტით მოსკოვს აშშ-ს პრეზიდენტის თანაშემწე ეროვნული უსაფრთხოების საკითხებში ჯონ ბოლტონი ეწვევა.

ორი ქვეყნის ლიდერებს შორის შეხვედრა, სავარაუდოდ, ტრამპის დიდ ბრიტანეთში ვიზიტის შემდეგ შედგება, რომელიც 13 ივლისისთვისაა ჩანიშნული.

აშშ-ს ეროვნული უსაფრთხოების საბჭოს აპარატში არც დაადასტურეს და არც უარყვეს ვლადიმერ პუტინისა და დონალდ ტრამპის შესაძლო შეხვედრის ჰელსინკში ჩატარების შესაძლებლობა.

აღსანიშნავია, რომ აქამდე ფინეთის მთავრობამ მზაობა გამოხატა რუსეთისა და აშშ-ს პრეზიდენტების შეხვედრას უმასპინძლოს.