სასტუმრო „რუმსში“ საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში“, Price waterhouse Coopers (PwC) თანამშრომლობით, ბრიტანეთის საელჩოს „კარგი მმართველობის ფონდის“ დაფინანსებით, საპილოტე პროექტის „ბიზნეს კავშირები მცირე და საშუალო ბიზნესისთვის“ პრეზენტაცია მიმდინარეობს.
როგორც "აწარმოე საქართველოში" სააგენტოს დირექტორის მოადგილემ თორნიკე სულაბერიძემ ჟურნალისტებს განუცხადა, პროექტის მიზანია გაიზარდოს მოქმედი მულტინაციონალური კომპანიებისა და საერთაშორისო ბრენდების გავლენა საქართველოს ეკონომიკაზე, ასევე დააკავშიროს ადგილობრივი მეწარმეები მულტინაციონალურ კომპანიებთან.
"აღნიშნული პროექტის ფარგლებში მცირე და საშუალო მეწარმეები მულტინაციონალურ კომპანიებთან თანამშრომლობით გრძელვადიან პერსპექტივაში შეძლებენ თავიანთი პროდუქციის ხარისხის გაუმჯობესებას, უფრო მეტი სამუშაო ადგილის შექმნას და პროდუქტის ადგილობრივ და საეთაშორისო ბაზარზე გაყიდვას,"- განაცხადა სულაბერიძემ.