გალში ინციდენტების პრევენციისა და მათზე რეაგირების მექანიზმის ფარგლებში დღეს დაგეგმილი შეხვედრა ჩაიშალა

გალში ინციდენტების პრევენციისა და მათზე რეაგირების მექანიზმის ფარგლებში დღეს დაგეგმილი შეხვედრა ჩაიშალა. ამის შესახებ სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ირაკლი ანთაძემ განაცხადა. მისი თქმით, ოკუპირებული აფხაზეთის და რუსული მხარის წარმომადგენლებმა ქართულ მხარეს შეხვედრის დაწყებისას დღის წესრიგიდან გიგა ოთხოზორიას მკვლელობის საკითხის ამოღება მოსთხოვეს, წინააღმდეგ შემთხვევაში კი განაცხადეს, რომ შეხვედრას დატოვებდნენ.

როგორც ანთაძემ ჟერნალისტებს ენგურის ხიდზე განუცხადა, საპასუხოდ მათ ადეკვატური პასუხი გასცეს, რომ ეს საკითხი ქართული მხარისთვის არის პრინციპული და მნიშვნელოვანი, რის შემდეგაც დე ფაქტო აფხაზეთის და რუსეთის ფედერაციის წარმომადგენლებმა შეხვედრა დატოვეს.

ამ დროისთვის უცნობია გაიმართება თუ არა მორიგი შერეული შეხვედრა გალში.

რაც შეეხება „ოთხოზორია ტატუნაშვილის სიას“, ანთაძის თქმით, მეორე მხარემ ეს საკითხი პოლიტიკური სიმულაციებისთვის გამოიყენა.