“ჯორჯიან უოთერ ენდ ფაუერმა“ ნაძალადევის რაიონში, ივერთუბნის დასახლებაში წყალმომარაგების სისტემის განვითარებისთვის 8 კილომეტრი სიგრძის ახალი ქსელი მოაწყო და წყალმომარაგების გაუმჯობესებისა და სტაბილურობისთვის ჩამკეტი ურდულები და რეგულატორები დაამონტაჟა.
როგორც „ინტერპრესნიუსს“ კომპანია “ჯორჯიან უოთერ ენდ ფაუერიდან“ აცნობეს, აღნიშნულ პროექტში GWP-მ 800 000 ლარზე მეტი ინვესტიცია განახორციელა.
„2018 წელსაც, ისევე როგორც შარშან, კომპანიის საინვესტიციო პროექტებს შორის ერთ-ერთი მნიშვნელოვანი მიმართულება წყალმომარაგების სისტემის განვითარებაა. ნაძალადევის რაიონში, ივერთუბნის დასახლებაში სამუშაოების დასრულების შემდეგ ჩვენს აბონენტებს საგრძნობლად გაუუმჯობესდებათ წყალმომარაგება, ხოლო ახალი, პოტენციური აბონენტებისთვის ქსელზე დაერთების შესაძლებლობა შეიქმნება. გარდა ამ პროექტისა, თბილისის მასშტაბით აქტიურად ვაგრძელებთ სარეაბილიტაციო სამუშაოებს. ამ მომენტისთვის, 30-ზე მეტ მისამართზე მიმდინარეობს წყალმომარაგების სისტემის განახლება“, - განაცხადა „ჯორჯიან უოთერ ენდ ფაუერის“ ოპერაციების მართვის დირექტორმა მამუკა კიკალიშვილმა.
აღსანიშნავია, რომ თბილისის წყალმომარაგების სისტემის განახლება განვითარებისთვის GWP 2018-2020 წლებში ინფრასტრქტურულ პროექტებში 200 მლნ ლარის ინვესტიციას განახორციელებს.