პოლონეთი დაჟინებით მოითხოვს რუსეთისთვის დაწესებული სანქციების შენარჩუნებას და მხარს არ უჭერს რუსეთთან ურთიერთობების გადატვირთვაზე მიმართულ ნაბიჯებს. ამის შესახებ პოლონეთის პრეზიდენტმა ანდჟეი დუდამ ლატვიის პრეზიდენტთან რაიმონდს ვეიონისთან გამართულ ერთობლივ პრესკონფერენციაზე განაცხადა.
„ჩვენ ვეწინააღმდეგებით ყველა იმ ქმედებებს, რაც შეიძლება მიმართული იყოს რუსეთთან ურთიერთობების გადატვირთვაზე“, - განაცხადა პოლონეთის პრეზიდენტმა.
ანდჟეი დუდას თქმით, „პოლონეთი არ ემხრობა რუსეთის იზოლირებას, თუმცა უკრაინასთან მიმართებაში რუსეთის პოლიტიკის გათვალისწინებით, არც იმის მომხრეა, რომ რუსეთთან დიალოგის დონის ამაღლება მოხდეს“.
„რუსეთმა ჯერ უნდა გამოავლინოს კეთილი ნება, რომ მშვიდობის განმტკიცებაზე სერიოზული დიალოგი სურს, რადგან ამჟამად რუსეთი, სამწუხაროდ, აგრესორია და ეს ფაქტია“, - დასძინა მან.