რუსთავი-თბილისი-დიდუბის სამარშრუტო ხაზზე, მგზავრთა გადაყვანის პროცესი ცოტა ხნის წინ აღდგა. როგორც ,,ინტერპრესნიუსს" კომპანია ,,ინტერტრანსის" საზოგადოებასთან ურთიერთობის სამსახურის უფროსმა სოფო ცერცვაძემ განუცხადა, გაფიცულ მძღოლებსა და კომპანიას შორის მოლაპარაკება შედგა.

,,მძღოლების ერთ-ერთი მოთხოვნა იყო მგზავრთა ნაკადის შემცირების გამო, შეგვემცირებინა ყოველდღიურად შემოსატანი გადასახადის ოდენობა. კომპანია წავიდა დათმობაზე და ნაცვლად 15 ივლისისა, ზაფხულის სეზონზე გადასვლასთან დაკავშირებით, 5 ივლისიდან შეამცირებს ყოველდღიური გადასახადის ოდენობას. მოგეხსენებათ, რომ ზაფხულში მგზავრთა ნაკადი რუსთავიდან, თბილისის მიმართულებით და პირიქით, მნიშვნელოვნად იკლებს და აქედან გამომდინარე, კომპანია მძღოლებსაც უმცირებს შემოსატანი თანხის ანუ დღიური ნორმის ოდენობას", - განაცხადა სოფო ცერცვაძემ.

დღეს დილიდან, რუსთავი-თბილისი-დიდუბის ხაზზე მოძრავი ყვითელი მიკროავტობუსების მძღოლები გაიფიცნენ. ისინი კომპანია ,,ინტერტრანსისათვის" გადასახდელი ყოველდღიური შენატანის შემცირებას ითხოვდნენ, რადგან აცხადებენ, რომ ზაფხულში მგზავრთა ნაკადი მნიშვნელოვნად მცირდება.