სამეგრელოს უკანასკნელი მთავრის, ნიკო დადიანის სასახლე პირვანდელ იერსახეს იბრუნებს, - უნიკალური არქიტექტურის მქონე შენობაში მიმდინარე სარეაბილიტაციო სამუშაოების მიმდინარეობის პროცესს დღეს საქართველოს პრემიერ-მინისტრი მამუკა ბახტაძე ადგილზე გაეცნო, - ამის შესახებ “ინტერპრესნიუსს“ მთავრობის ადმინისტრაციიდან აცნობეს.

მათივე განმარტებით, კაპიტალურად გამაგრდა სასახლის კონსტრუქციული სეგმენტები, შენობა მოპირკეთდა ავთენტური წყობისა და ფორმის ძველი ქართული აგურით.

„მოეწყო სავენტილაციო, კონდიცირებისა და გათბობის თანამედროვე კომუნიკაციები; სასახლეში სრულად რესტავრირდა ავთენტური კარ-ფანჯარა. ნიკოსეული სასახლის სარეაბილიტაციო სამუშაოები, რომლის ღირებულება 2 მლნ ლარია, სექტემბერში დასრულდება“, - ნათქვამია მთავრობის ადმინისტრაციის ინფორმაციაში.

მათივე ცნობით, პრემიერ-მინისტრი დადიანების სასახლეთა ისტორიულ–არქიტექტურული მუზეუმის კომპლექსში შემავალ სხვა ობიექტებზეც, მათ შორის მთავრისეულ ტაძარში, სასახლესთან არსებულ ბოტანიკურ დეკორატიულ ბაღში და მუზეუმში იმყოფებოდა, რომელიც დადიანის ძველ ნივთთა საცავ-საგანძურისა და სამეგრელოს ეკლესია–მონასტრებიდან გადმოტანილ ქართულ სიძველეთა ბაზაზე დაარსდა.

აღსანიშნავია, რომ პრემიერი ზუგდიდის ბოტანიკური ბაღის რეაბილიტაციის მიმდინარეობითაც დაინტერესდა, რომელიც კულტურული მემკვიდრეობის დაცვის ეროვნული სააგენტოსა და ფონდი „ქართუს“ დაფინანსებით მიმდინარეობს.