თეთრიწყაროს მუნიციპალიტეტის თვითმმართველობაში მერის სამოქალაქო მრჩეველთა საბჭოს სხდომები აქტიურად იმართება, - ამის შესახებ „ინტერპრესნიუსს“ თეთრიწყაროს მუნიციპალიტეტიდან აცნობეს.
მათივე ინფორმაციით, 27 ივნისს, თეთრიწყაროს მუნიციპალიტეტის მერის სათათბირო ორგანოს - სამოქალაქო მრჩეველთა საბჭოს მორიგი სხდომა გაიმართა. სხდომის დაწყებამდე საბჭოს წევრებს სიტყვით მიმართა თეთრიწყაროს მუნიციპალიტეტის მერის მოვალეობის შემსრულებელმა მალხაზ სამაშვილმა და სამოქალაქო აქტიურობისათვის მადლობა გადაუხადა. ამის შემდგომ, საბჭოს თავმჯდომარემ გულიკო შოშიტაშვილმა სხდომა გახსნილად გამოაცხადა.
„საბჭომ განიხილა დღის წესრიგით გათვალისწინებული შემდეგი საკითხები: სამოქალაქო მრჩეველთა საბჭოს მიერ მომზადებული რეკომენდაცია/შენიშვნები 2018 წლის 4 მაისის სხდომაზე თეთრიწყაროს მერიის მიერ წარმოდგენილი დოკუმენტაციის თაობაზე; თეთრიწყაროს მუნიციპალიტეტში ტურიზმის განვითარების სტრატეგიის დოკუმენტის სამუშაო ვერსია;
ევროკავშირის ინიციატივა „მერები ეკონომიკური ზრდისთვის“ და ეკონომიკური განვითარების გეგმის შემუშავების მიმდინარე პროცესი.
საბჭომ ადგილობრივ თვითმმართველობას წარუდგინა შენიშვნები და რეკომენდაციები 4 მაისს საბჭოს სხდომაზე განხილულ საკითხებზე, კერძოდ, ქ. თეთრიწყაროს მხარეთმცოდნეობის მუზეუმის კულტურული მემკვიდრეობის სააგენტოსათვის სარგებლობის უფლებით გადაცემის პირობებთან და კულტურის სტრატეგიის განხორციელების მოკლევადიანი სამოქმედო გეგმით გათვალისწინებული ღონისძიებების განხორციელების ვადებთან და ფინანსურ მხარესთან დაკავშირებით.
სხდომა გაგრძელდა დისკუსიით, საბჭოს წევრებმა იმსჯელეს დღის წესრიგით გათვალისწინებულ საკითხებზე, მრჩევლების და სამოქალაქო საზოგადოების წარმომადგენლების მიერ დასმულ შეკითხვებს მერიის შესაბამისი სამსახურების წარმომადგენლებმა უპასუხეს.
სამოქალაქო მრჩევლებმა მერიის მიერ წარდგენილ დოკუმენტებზე თავისი მოსაზრებებისა და შენიშვნების მოსამზადებლად გონივრული ვადა ითხოვეს. ამის შემდგომ სხდომა დახურულად გამოცხადდა“, - ნათქვამია ინფორმაციაში.