ოკუპირებული „სამხრეთ ოსეთის“ დე ფაქტო პარლამენტის წევრის, პეტრე გასიევის განცხადებით, „სამხრეთ ოსეთი ასევე ამზადებს სასანქციო სიას“.

„პარლამენტში უკვე დიდი ხანია შემუშავებულია კანონპროექტი, სამხრეთ ოსეთის სია, რომელსაც პირობითად „გრიგორი სანაკოევის სია“ ჰქვია, რომელიც ქართველებმა 1992 წელს სასტიკად მოკლეს. ეს კანონი, სავარაუდოდ, წლის ბოლომდე იქნება მიღებული. მასში მოხვდებიან საქართველოს, ამერიკის, უკრაინისა და სხვა ქვეყნების მოქალაქეები, რომლებიც სამხრეთ ოსეთში გენოციდში იღებდნენ მონაწილეობას“, - აღნიშნა ე.წ. დეპუტატმა.

მისივე თქმით, „სამხრეთ ოსეთში უკვე მიეჩვნიენ საქართველოს ხელისუფლების აბსურდულ ქმედებებს“.

„მხარე, რომელმაც ორჯერ განახორციელა ოსი ხალხის გენოციდი, ამგვარ სიებს იღებს. ეს აბსოლუტურად მათი სტილია“, - დასძინა მან.

როგორც ცნობილია, საქართველომ მთავრობამ  გუშინდელ სხდომაზე „ოთხოზორია-ტატუნაშვილის სია“ დაამტკიცა, რომელიც 33 პირისგან შედგება.