აშშ-ს პრეზიდენტი დონალდ ტრამპი რუსეთის პრეზიდენტ ვლადიმერ პუტინთან ეკონომიკურ ურთიერთობებს, უკრაინისა და სირიის საკითხებს განიხილავს, - ამის შესახებ აშშ-ს ვიცე-პრეზიდენტმა მაიკლ პენსმა სააგენტო Bloomberg-ისთვის მიცემულ ინტერვიუში განაცხადა.
„ფართო წრეა საკითხების, რომელზეც დონალდ ტრამპი ისაუბრებს და რომლებიც გადაჭრას საჭიროებენ. ამ საკითხებს შორის არის აშშ-ს და რუსეთის ეკონომიკური ურთიერთობები, ასევე უკრაინაში და სირიაში შექმნილი ვითარება“, - აღნიშნა აშშ-ს ვიცე-პრეზიდენტმა.
მაიკლ პენსმა ასევე განაცხადა, რომ დონალდ ტრამპი აშშ-ს არჩევნებში რუსეთის ჩარევის თემასაც განიხილავს.
აშშ-ს ვიცე-პრეზიდენტმა განმარტება არ გააკეთა იმის თაობაზე, მიიჩნევს თუ არა შესაძლებლად რუსეთის „დიდ რვიანში“ დაბრუნებას.
გუშინ რუსეთის პრეზიდენტის თანაშემწემ იური უშაკოვმა განაცხადა, რომ მოსკოვმა და ვაშინგტონმა შეათანხმეს რუსეთისა და აშშ-ს პრეზიდენტების შეხვედრის დრო და ადგილი, რაზეც განცხადება დღეს გაკეთდება.