რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე აშშ-ის საერთაშორისო განვითარების სააგენტოს მთავარ მრჩეველს, ასევე ორგანიზაციის წარმომადგენლებს საქართველოში თამარ სირბილაძესა და გიორგი ხეჩინაშვილს შეხვდა.
როგორც “ინტერპრესნიუსს“ რელიგიის საკითხთა სახელმწიფო სააგენტოდან აცნობეს, შეხვედრაზე ზაზა ვაშაყმაძემ სტუმრებს გააცნო ინფორმაცია რელიგიის სააგენტოს შექმნისა და საქმიანობის, საქართველოს რელიგიურ, დემოგრაფიულ და ეთნიკურ მახასიათებლების, სახელმწიფოს მიერ რელიგიური უმცირესობების მიმართ განხორციელებული წარმატებული ნაბიჯების შესახებ, კერძოდ, კონფესიების დაფინანსებისა და რელიგიური უძრავი ქონების გადაცემის მექანიზმების თაობაზე, საუბარი ასევე შეეხო რელიგიის სააგენტოს მიერ შემუშავებულ პროექტებს, გამართულ კონფერენციებსა და ადამიანის უფლებათა სამთავრობო - სამოქმედო გეგმის ფარგლებში განხორციელებულ ტრენინგებს.
მათივე ცნობით, სტუმრებმა სააგენტოს თავმჯდომარეს მადლობა გადაუხადეს მიღებული ინფორმაციისათვის და მომავალი თანამშრომლობისათვის მზადყოფნა გამოთქვეს.