„პალიტრანიუსის“ თოქ შოუ „360 გრადუსში“ დღეს, „კვირის პალიტრის“ მიერ მოპოვებული აჰმედ ჩატაევის ხმოვანი გზავნილი გამოქვეყნდება

„კვირის პალიტრამ“ ბერი გაბრიელ სალოსის გამზირზე ლიკვიდირებული აჰმედ ჩატაევის ხმოვანი გზავნილი მოიპოვა, რომელიც ISIS-ის ერთ-ერთ ლიდერს, აბუ ჯიჰადს, იგივე ისლამ ატაბიევს გაუგზავნა.

გამოცემის ინფორმაციით, ჩანაწერი სავარუდოდ 2017 წლის ზამთარშია გაკეთებული და მასში საუბარია თურქეთში დასაგეგმ ტერაქტებზე. სხვა საკითხებთან ერთად ჩანაწერში ჩატაევი საქართველოს შესახებაც ჰყვება: „მე ძმაო საქართველოშიც გავაკეთებ იგივეს, აქვეა, ახლოს“, - ამბობს ჩანაწერში ჩატაევი.

ჩატაევის ლიკვიდაცია ქართველი სამართალდამცველების მიერ, თბილისში გასული წლის ნოემბერში, ბერი გაბრიელ სალოსის გამზირზე ჩატარებული სპეცოპერაციისას მოხდა. ჩანაწერის სრული ვერსია და ჩატაევის საქმის დეტალები, დღეს 21:00 საათზე „პალიტრანიუსის“ თოქ შოუ „360 გრადუსში“ გამოქვეყნდება.

სახელმწიფო უსაფრთხოების სამსახური ჯერ კიდევ რამდენიმე თვის წინ აცხადებდა, რომ საგამოძიებო მოქმედებების შედეგად, ბერი გაბრიელ სალოსის ქუჩაზე მდებარე ბინიდან ამოღებული ახმედ ჩატაევის კუთვნილი კომპიუტერიდან და სხვადასხვა ტექნიკური მოწყობილობებიდან მოპოვებულია აუდიო ჩანაწერები. ჩანაწერების მიხედვით, ახმედ ჩატაევი და მისი თანამზრახველები ტერორისტული აქტების განხორციელებას გეგმავდნენ საქართველოსა და თურქეთში. მათ მიზანს დიპლომატიურ მისიებზე თავდასხმები წარმოადგენდა.