ფესტივალ “Art-გენი 2018-ის” რეგიონული ტურნე ლეჩხუმში დასრულდა. როგორც „ინტერპრესნიუსს“ ფესტივალის ორგანიზატორებმა აცნობეს, თბილისის ტური ეთნოგრაფიულ მუზეუმში 8-15 ივლისს გაიმართება.
„Art-გენი 2018“-მა სტარტი 21 ივნისს რეგიონული ტურნეთი აიღო. „Art-გენი“ წელს საქართველოს 4 რეგიონში - აჭარა, გურია, იმერეთი, ლეჩხუმი, 9 დღის განმავლობაში მოგზაურობდა. 15-წლიანი არსებობის მანძილზე ეს ყველაზე მასშტაბური რეგიონული ტურნე იყო.
ოთხივე რეგიონში ფესტივალზე წარმომადგენილი იყო: ხალხური რეწვის გამოფენები; ქართული საბრძოლო ხელოვნება "შავფაროსნების" საჩვენებელი წარმოდგენები; ფოლკლორული პროგრამა ადგილობრივი ანსამბლების მონაწილეობით და ჯგუფ „ფრანის“ და ჯგუფ „რეგიონის“ დასკვნითი კონცერტები.
„წელს, ფესტივალი მაყურებელს თბილისის ტურზე საინტერესო სიახლეებს სთავაზობს, მათ შორის იქნება, ჰიპ-ჰოპის დღე. ერთი კვირის განმავლობაში, ეთნოგრაფიულ მუზეუმში წარმოდგენილი იქნება ქართული ტრადიციული რეწვის გამოფენები. ტრადიციულად მოეწყობა ჰამაკების და პუფების ზონა, ასევე წარმოდგენილი იქნება ქართული სამზარეულო და სხვადასხვა ტიპის კრეატიული სივრცეები“, - აცხადებენ ორგანიზატორები.
8 ივლისს თბილისის ტურს ნინო ქათამაძე და ჯგუფი „ინსაითი“ გახსნის“. 15 ივლისს კი ნიაზ დიასამიძის და „33-ა“-ს კონცერტით დაიხურება.
წელს, „Art-გენ“-ზე პირველად ჰიპ-ჰოპის დღე გაიმართება. „Art-გენის“ მაყურებელს ტრადიციულად ელოდება „სუხიშვილების“ , რობი კუხიანიძის, ჯგუფ „ფრანის“ და ჯგუფ ReGGaeon - ის კონცერტები. ასევე, უკვე მეორედ „Art-გენის“ სცენა დაეთმობა ჯგუფ Asea Sool-ს, რომლის სიმღერის ჩანაწერიც სულ ცოტა ხნის წინ ინტერნეტ სივრცეში ჰიტად იქცა და მაყურებლის ფართო აუდიტორიის მოწონება დაიმსახურა.
ფესტივალი „Art-გენი“ 2004 წელს დაფუძნდა. ამ დროის განმავლობაში ფესტივალმა მთელი საქართველოს მასშტაბით, უნიკალური ეთნოგრაფიული მასალები მოიკვლია და დააარქივა. მათ შორის, დაკარგვის პირას მყოფი, ბევრი უნიკალური მასალა.