ირაკლი აბესაძე - ბიუჯეტიდან მილიონობით ლარი ხვდება ადამიანების ხელში, რომლებიც რუსეთის სასარგებლოდ ჯაშუშობდნენ

სახელმწიფო ბიუჯეტიდან მილიონობით ლარი ხვდება ადამიანების ხელში, რომლებიც რუსეთის სასარგებლოდ ჯაშუშობდნენ, - ამის შესახებ „ევროპული საქართველოს“ წევრმა ირაკლი აბესაძემ თავდაცვისა და შინაგან საქმეთა მინისტრების პარლამენტში დაბარებასთან დაკავშირებული ინიციატივის შეფასებისას განაცხადა. აბესაძე ასევე მიიჩნევს, რომ საჭიროა ამ საკითხზე მსჯელობაში პარლამენტის ნდობის ჯგუფიც ჩაერთოს.

„მილიონობით ლარი ხვდება ადამიანების ხელში, რომლებიც რუსეთის სასარგებლოდ ჯაშუშობდნენ და რომლებმაც ეს თანხა შესაძლებელია კვლავ გამოიყენონ საქართველოს ინტერესების საწინააღმდეგოდ. რა თქმა უნდა, ამ საკითხზე დეტალური განმარტება უნდა გააკეთოს პრემიერ-მინისტრმა, თავდაცვის და შს მინისტრებმა პარლამენტში. საიდუმლო ნაწილზე აუცილებელია ნდობის ჯგუფში მსჯელობაც“, - განაცხადა ირაკლი აბესაძემ.

სტუდია ”მონიტორის“ ჟურნალისტური გამოძიების თანახმად, ბიზნესმენმა პეტრე დევრიშაძემ და მისი ოჯახის ორმა კომპანიამ ბოლო სამ წელიწადში 4 მილიონ ლარზე მეტი ღირებულების სახელმწიფო ტენდერი მოიგო. კომპანიები სახელმწიფო შეკვეთებს ძირითადად შინაგან საქმეთა და თავდაცვის სამინისტროებისგან იღებენ.

დევრიშაძე 2010 წელს ”გრუ“-სთან თანამშრომლობის ბრალდებით დააპატიმრეს. ის ოპერაცია “ენვერის” დროს დაკავებული 13 პირიდან ერთადერთია, რომელმაც რუსულ სპეცსამსახურთან თანამშრომლობა აღიარა და საჯაროდ დღემდე არ უარყვია. პეტრე დევრიშაძეს საპროცესო შეთანხმება 2011 წელს გაუფორმეს.