ჩვენ შევიმუშავეთ სტრატეგია, რომელიც მინიმუმამდე დაიყვანს ბულინგის შემთხვევებს სკოლაში,- ამის შესახებ განათლებისა და მეცნიერების მინისტრის მოადგილემ, ლია გიგაურმა განაცხადა.
მისი თქმით, სტრატეგია ეყრდნობა იმ მონაცემებს, რომელიც კვლევების შედეგად იქნა მიღებული და რომელიც მშობლების, მოსწავლეებისა და მასწავლებლების გამოკითხვას ეფუძნება.
"ეს ეხება როგორც სავალდებულო პროგრამებს სკოლაში და ფორმალურ განათლებაში, ასევე სერვისებს, რომლებსაც მოსწავლეებს უსაფრთხოების დასაცავად და შემდგომი რეაბილიტაციისთვის შევთავაზებთ. იქნება ისეთი აქტივობები, რომელიც თავისუფალი დროის სრულ მენეჯმენტს განახორციელებს იმისთვის, რომ მოსწავლეებმა თავისუფალი დრო ეფექტიანად გამოიყენონ. პროგრამები, რომლებიც იანვრიდან ხორციელდება, გაგრძელდება. ეს არის ის სტრატეგია, რომელიც მინიმუმამდე დაიყვანს ბულინგის შემთხვევებს სკოლაში. მთლიანად აღმოფხვრას რაც შეეხება, არ არსებობს მოსწავლეების და მოზარდების ისეთი თავშეყრის ადგილი, სადაც შეიძლება ეს საერთოდ არ არსებობდეს. ჩვენი მიზანია, რომ შევამციროთ მაქსიმალურად და ასეთი შემთხვევები მინიმუმადე იყოს დაყვანილი", - განაცხადა გიგაურმა.