გომბორზე მომხდარი ავტოსაგზაო შემთხვევის შედეგად დაშავებული ტურისტი საგანგებო სიტუაციების კოორდინაციისა და გადაუდებელი დახმარების ცენტრის დირექტორმა, ავთანდილ თალაკვაძემ ბელარუსის რესპუბლიკის ელჩთან, მიხაილ მიატლიკოვთან ერთად მოინახულა.

როგორც „ინტერპრესნიუსს“ საქართველოს შრომის, ჯანმრთელობისა და სოციალური დაცვის სამინისტროს საგანგებო სიტუაციების კოორდინაციისა და გადაუდებელი დახმარების ცენტრიდან აცნობეს, პაციენტი ამ დროისთვის ტრავმატოლოგიურ ჰოსპიტალში იმყოფება. ასევე, მათივე ცნობით, თელავის რეფერალურ საავადმყოფოში გადის მკურნალობას კიდევ ერთი დაშავებული ტურისტი. მათი ჯანმრთელობის მდგომარეობა სტაბილურია.

გომბორზე ავტოსაგზაო შემთხვევა გუშინ მოხდა. ტურისტებით სავსე მიკროავტობუსი ამობრუნდა. 27 მგზავრიდან ჰოსპიტალიზაცია 25-ს დასჭირდა. 23 დაშავებული, სამედიცინო დახმარების აღმოჩენის შემდეგ, ბინაზე გაეწერა, 2 კი ამ დრომდე კლინიკაში, ექიმთა მეთვალყურეობის ქვეშ რჩება.