აჭარის ავტონომიური რესპუბლიკის უმაღლესი საბჭოს აგრარულ და გარემოს დაცვის საკითხთა კომიტეტის სხდომაზე, რომელსაც ამავე კომიტეტის თავმჯდომარე ვახტანგ წულაძე უძღვებოდა, დღის წესრიგით გათვალისწინებული 2 საკითხი განიხილეს.
როგორც „ინტერპრესნიუსს“ აჭარის ავტონომიური რესპუბლიკის უმაღლესი საბჭოდან აცნობეს, კომიტეტმა ცნობად მიიღო საქართველოს პარლამენტის წევრების - კახაბერ კუჭავას, სულხან მახათაძის, კობა ლურსმანაშვილის, ენძელა მაჭავარიანისა და ზაზა ხუციშვილის მიერ საკანონმდებლო ინიციატივის წესით წარდგენილი საქართველოს კანონების პროექტები: „წყლის შესახებ საქართველოს კანონში ცვლილების შეტანის შესახებ“, „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“. საკანონმდებლო ორგანოს წევრებს, შენიშვნები და წინადადებები არ გამოუთქვამთ.
როგორც აჭარის უმაღლესი საბჭოს ინფორმაციაშია აღნიშნული, კომიტეტის წევრებმა ანალოგიური გადაწყვეტილება მიიღეს საქართველოს პარლამენტის წევრების - ოთარ დანელიასა და ირაკლი შიოლაშვილის საკანონმდებლო ინიციატივასთან დაკავშირებითაც.
მათი ცნობით, „სახელმწიფო პროექტის ფარგლებში მიწის ნაკვეთებზე უფლებათა სისტემური და სპორადული რეგისტრაციის სპეციალური წესისა და საკადასტრო მონაცემების სრულყოფის შესახებ“ საქართველოს კანონის პროექტთან დაკავშირებით შენიშვნები არ გამოთქმულა.