GIPA-მ მორიგი პარტნიორობა იტალიის ერთ-ერთ უძველეს პერუჯას უნივერსიტეტთან დაამყარა. როგორც „ინტერპრესნიუსს“ GIPA-დან აცნობეს, აღნიშნული თანამშრომლობის ფარგლებში, მხარეებმა გაცვლითი პროგრამა შეიმუშავეს. კერძოდ, წელიწადში 4 სტუდენტს საშუალება ექნება გაემგზავრონ იტალიაში ერთი სემესტრის სრულად გასავლელად.

სტუდენტთა გაცვლითი პროგრამით GIPA იტალიიდან სტუდენტებს მიიღებს. პერუჯას უნივერსიტეტთან თანამშრომლობა ასევე ითვალისწინებს შემდეგ მიმართულებებს: ერთობლივი კვლევები და პუბლიკაციები; ერთობლივი სემინარების, კონფერენციების და სხვა ღონისძიებების ორგანიზება; აკადემიური და ადმინისტრაციული პერსონალის გაცვლა.

პერუჯას უნივერსიტეტი 1308 წელს დაარსდა და დღევანდელი მონაცემებით 24 000-მდე სტუდენტი ჰყავს. GIPA აქტიურად აგრძელებს მუშაობას უნივერსიტეტის ინტერნაციონალიზაციისა და საერთაშორისო პარტნიორობების დამყარების მიმართულებით, რათა სტუდენტებს მიეცეთ შესაძლებლობა, შეარჩიონ მათთვის სასურველი გაცვლითი პროგრამა, ევროპასა თუ ამერიკაში.