შინაგან საქმეთა სამინისტროს გამომძიებელი ირაკლი ფიფია აცხადებს, რომ გამოძიების დაწყებისთანავე, დასაწყისში მირზა სუბელიანის გამოკითხვა არ მოხდა, ვინაიდან მის მიმართ არანაირი ეჭვი არ გაჩენილა. ასე უპასუხა ფიფიამ პარლამენტში შექმნილი საგამოძიებო კომისიის სხდომაზე დეპუტატ ანრი ოხანაშვილის კითხვას იმის შესახებ, თუ რატომ არ გამოიკითხა მირზა სუბელიანი.

“გამოძიების ეტაპზე არ იყო არანაირი ეჭვი ან გარემოება, რომ მირზა სუბელიანს რაიმე სახით ჰქონოდა შემხებლობა კონკრეტულად რაიმე დანაშაულთან, შესაბამისად, მისი გამოკითხვა არ მომხდარა. დადასტურებულია ის გარემოება, რომ მირზა სუბელიანი იმყოფებოდა პეკინის #3-ში, სადაც არის მ.კ.-ს საცხოვრებელი კორპუსი. ეს დადასტურებეული იყო ჩვენებებითაც, საიდანაც ასევე დასტურდება, რომ იგი მოუწოდებდა თავის ნათესავებს, რომ ეთანამშრომლათ გამოძიებასთან. მირზა სუბელიანმა წარმოადგინა თავისი შვილი მომხდარი შემთხვევიდან რამდენიმე საათში, წარმოადგინა მისი ტანსაცმელი და გამოძიების პროცესში მის მიმართ კითხვები არ გაჩენილა“, - განაცხადა ფიფიამ.