გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის გარემოსდაცვითი პატრულირებისა და სწრაფი რეაგირების სამსახურის თანამშრომლებმა, შინაგან საქმეთა სამინიტროს ძველი თბილისის პოლიციის სამმართველოდან შესული ინფორმაციის საფუძველზე, ხე-ტყის უკანონო ტრანსპორტირების ფაქტი გამოავლინეს. ამის შესახებ „ინტერპრესნიუსს“ გარემოს დაცვისა და სოფლის მეურნეობის სამინისტროდან აცნობეს. მათივე ინფორმაციით, თბილისში, კოჯრის გზატკეცილზე გადამოწმებული ავტომანქანის ძარაზე 20 ერთეული 3 მეტრიანი წიწვოვანი სახეობის სამასალე მორი იყო განთავსებული.

როგორც სამინისტროს ინფორმაციაშია აღნიშნული, ავტომანქანის მძღოლმა ვერ წარმოადგინა ხე-ტყის წარმოშობის დოკუმენტაცია. ადმინისტრაციული სამართალდარღვევის შესახებ ოქმი 1282 მუხლის მე-4 ნაწილით შედგა, რაც ითვალისწინებს ჯარიმას 1000 ლარის ოდენობით. სამინისტროს ცნობით, ავტომანქანა დაილუქა.