როგორც ჩანს, საღამოს ბოკერია „ვიკიპედიაზე“ წერს, ხოლო დილით ჭიაბერაშვილი ინფორმაციას კითხულობს, - ამის შესახებ მთავრობის სტრუქტურულ ცვლილებებზე საუბრისას საპარლამენტო უმრავლესობის წევრმა დავით ჭიჭინაძემ განაცხადა.

დავით ჭიჭინაძე გამოეხმაურა საპარლამენტო უმცირესობასა და უმრავლესობას შორის კამათს. კამათი „ევროპული საქართველოს“ წევრის, ზურაბ ჭიაბერაშვილის გამოსვლას მოჰყვა, რომელმაც განაცხადა, რომ მთავრობის სტრუქტურული ცვლილებებით რეალურად არაფერი იცვლება და წარმოდგენილი ცვლილებები არის მხოლოდ კოსმეტიკური. კამათის ერთ-ერთი საგანი იყო ჭიაბერაშვილის მიერ სიღარებასთან დაკავშირებული განცხადებაც.

„როგორც ჩანს, ბატონი ზურაბი წაბრძანდა ახლა „ვიკიპედიაში“ ინფორმაციის გადასამოწმებლად. პარლამენტის წევრი რომ „ვიკიპედიათი“ ილაპარაკებს, იმით ყველაფერი ნათქვამია. ეტყობა, საღამოს ბოკერია წერს და დილით ჭიაბერაშვილი კითხულობს და გვიმტკიცებს რა არის სიმართლე ამ ქვეყანაში,“ - განაცხადა დავით ჭიჭინაძემ.