საქართველოს კონკურენციის სააგენტოს თავმჯდომარის ნოდარ ხადურის ხელმძღვანელობით, კონკურენციის სფეროში მეორე საერთაშორისო კონფერენციის საორგანიზაციო კომიტეტის პირველი სხდომა გაიმართა.
კონკურენციის სააგენტოს პრესსამსახურის ინფორმაციით, შეხვედრას ასევე ესწრებოდნენ - თბილისის სახელმწიფო უნივერსიტეტის ვიცე-რექტორი, პროფესორი ალექსანდრე ცისკარიძე, პროექტის „საქართველოს კონკურენციის სააგენტოს მხარდაჭერა“ გუნდის ხელმძღვანელი, აურელიო ლა ტორე და კომიტეტის სხვა წევრები.
„კონკურენციის სფეროში მეორე საერთაშორისო კონფერენციას - “კონკურენციის პოლიტიკა: ტენდენციები და გამოწვევები“, რომელიც 28-29 სექტემბერს საქართველოში გაიმართება, დაესწრებიან: საქართველოს აღმასრულებელი, საკანონმდებლო და სასამართლო ხელისუფლების წარმომადგენლები; საერთაშორისო და ადგილობრივი ორგანიზაციების, მეგობარი ქვეყნების კონკურენციის უწყებების ხელმძღვანელი პირები; აკადემიური წრეების წარმომადგენლები; კონკურენციის პოლიტიკის ადგილობრივი და საერთაშორისო ექსპერტები და ა.შ.
„საქართველო ხდება კონკურენციის საერთაშორისო ოჯახის ღირსეული წევრი და, შესაბამისად, კონფერენცია, სადაც განიხილება თემები, როგორიცაა – საქართველოს კონკურენციის სამართლის ევროპულ კანონმდებლობასთან ჰარმონიზაცია; კარტელური შეთანხმების სახეები, სპეციფიკა და შეფასების თეორიული საფუძვლები; დომინირებული მდგომარეობის ბოროტად გამოყენება; სახელმწიფო დახმარებები; კონკურენციის პრობლემატიკა სახელმწიფო შესყიდვებში; კონკურენციის პოლიტიკა რეგულირებად სექტორებში; ობიექტური გამართლების კრიტერიუმები კონკურენციულ სამართლებრივ დავებში და ა.შ. კონფერენციის ორგანიზატორებს სრული მობილიზება გვმართებს“, - განაცხადა ნოდარ ხადურმა შეხვედრაზე.
კონკურენციის პოლიტიკის მეორე საერთაშორისო კონფერენციის ორგანიზატორები არიან – საქართველოს კონკურენციის სააგენტო, ევროკავშირი საქართველოსთვის – პროექტი „საქართველოს კონკურენციის სააგენტოს მხარდაჭერა“ და ივანე ჯავახიშვილის სახელობის თბილისის სახელმწიფო უნივერსიტეტი.
საორგანიზაციო კომიტეტის პირველ სამუშაო შეხვედრაზე კონფერენციის მოსამზადებელი საკითხები, პრიორიტეტების მიხედვით, გადანაწილდა და სამუშაო-სამოქმედო გეგმა დეტალურად გაიწერა.
საქართველოს კონკურენციის სააგენტოს თავმჯდომარის ნოდარ ხადურის გადაწყვეტილებით, კონკურენციის პოლიტიკის მეორე საერთაშორისო კონფერენცია საქართველოს დამოუკიდებლობისა და ივანე ჯავახიშვილის სახელობის თბილისის სახელმწიფო უნივერსიტეტის 100 წლის იუბილეებს ეძღვნება.