მარიამ ჯაში - ჩვენ ხელი უნდა შევუწყოთ იმ საინფორმაციო-ტექნოლოგიურ მიმართულებებს, რომელიც ვირტუალურ მუზეუმებს უკავშირდება

განათლების, მეცნიერებისა და კულტურის კომიტეტის თავმჯდომარე მარიამ ჯაში დღეს ICOM-ის მუზეუმების საერთაშორისო საბჭოს პრეზიდენტს, სუეი აქსოისა და ICOM-ის შემოწირულობათა ფონდის დირექტორს, ბიორნ სტენვერსს შეხვდა, რომლებიც საქართველოში საერთაშორისო ფორუმის ფარგლებში იმყოფებიან.

საქართველოს პარლამენტის პრესსამსახურის ინფორმაციით, შეხვედრაზე საუბარი შეეხო სამომავლო თანამშრომლობას. მათივე ინფორმაციით, მარიამ ჯაში მოხარულია, რომ საქართველო საერთაშორისო ფორუმებისა და სემინარების მასპინძლობით ერთგვარი ცენტრი ხდება მუზეუმების საერთაშორისო ორგანიზაციისთვის.

„ვისაუბრეთ მიმდინარე სარეაბილიტაციო სამუშაოებზე, რომელიც ქვეყნის მასშტაბით უკვე 18 მუზეუმს მოიცავს. ყურადღება გამახვილდა მთავარ ასპექტზე - მართვის სისტემის გაუმჯობესებაზე, რათა უფრო თანამედროვე და ინოვაციებზე დაფუძნებული გახდეს მუზეუმები საქართველოში ჩვენს კოლეგებთან ერთად მომავალში განვიხილავთ საპარლამენტო ინიციატივას, რომელიც არა მარტო საქართველოში, არამედ სხვა ქვეყნების პარლამენტებსა და ეროვნულ ასამბლეებში იქნება მნიშვნელოვანი მუზეუმების მხარდაჭერის, განვითარებისა და პოპულარიზაციის მიზნით. განსაკუთრებით აქტუალურად წარიმართა ის დისკუსია, რომელიც კულტურისა და განათლების სისტემების ინტეგრაციას უკავშირდება. ჩვენ ხელი უნდა შევუწყოთ მოსწავლეებისა და სტუდენტების რეგულარულ ვიზიტებს მუზეუმებში, ასევე, იმ საინფორმაციო-ტექნოლოგიურ მიმართულებებს, რომელიც ვირტუალურ მუზეუმებს, განსაკუთრებით კი საქართველოს ოკუპირებულ ტერიტორიებზე დარჩენილ საუნჯეებს უკავშირდება“, - აღნიშნა მარიამ ჯაშმა.

შეხვედრაზე ისაუბრეს მუზეუმების განვითარების თვალსაზრისით სამეცნიერო კვლევებში მონაწილეობის მნიშვნელობაზე.

„ამ კუთხით ჩვენ გვექნება გარკვეული ცვლილებები საკანონმდებლო რეგულაციებში. თანამედროვე სამყაროში მნიშვნელოვანი ხდება კერძო სექტორის როლი მუზეუმების პოპულარიზაციასა და განვითარებაში. ამ თვალსაზრისით საინტერესო იქნება ჩვენი კომიტეტის მუშაობა ქველმოქმედების - ფილანტროპიის კანონზე, რათა ბიზნესს რეალურად გაუჩნდეს სტიმული, მოახდინოს ინვესტირება განათლების, კულტურის და სხვა სოციალურ სფეროებში“, - განაცხადა მარიამ ჯაშმა.

ალექსანდრე თვალჭრელიძე - „ქართული ოცნების“ ეკონომიკური პროგრამა გაცილებით უფრო მოკრძალებული, მაგრამ, ამავდროულად, გაცილებით უფრო რეალისტურია
გია ხუხაშვილი - თუ პროპორციულ არჩევნებში ხელისუფლებამ ვერ მოახერხა 40%-იანი ბარიერის გადალახვა, ხელისუფლებას მეორე ტურში შეიძლება შეექმნას სერიოზული პრობლემა
ქართული პრესის მიმოხილვა 17.09.2020
რან გიდორი - სწრაფვა მშვიდობისკენ კორონავირუსის დასამარცხებლად
"მემარცხენე ალიანსის" ლიდერი კახა ძაგანია - "ვხსნით ჩვენს პარტიას რეგისტრაციიდან და ვუერთდებით "პატრიოტთა ალიანსს"
ირმა ინაშვილი - ჩვენთან მიმართებაში გამოცხადებულია საინფორმაციო ბლოკადა
წინანდლის მამული რიგით მეორე მუსიკალურ ფესტივალს მასპინძლობს
წინანდლის მუზეუმს შარლ დე გოლის წერილები გადაეცა