ამ წუთას არც ერთ კაფეზე არ ვიწყებთ საქმის წარმოებას, მაგრამ თუ არ მოაწესრიგებენ დოკუმენტაციას, მათ წინააღმდეგ იქნება გათვალისწინებული საჯარიმო სანქციები, - ამის შესახებ ზედამხედველობის საქალაქო სამსახურის უფროსმა, გიორგი ბაგრატიონმა განაცხადა.
"ზედამხედველობის საქალაქო სამსახურმა ქალაქის მასშტაბით გააფრთხილა ღია კაფეების მეპატრონეები, რომ მიმართონ მერიის შესაბამის სამსახურებს რათა მოაწესრიგონ ის დოკუმენტაცია, რომელსაც მათ კანონი ავალდებულებთ. ჩვენ არ ვართ წინააღმდეგი, რომ მათ საქმიანობა განახორციელონ, უბრალოდ, უნდა მოაწესრიგონ დოკუმენტაცია. თუ ასე არ მოიქცევიან, ჩვენი სამსახურის მიერ შესაბამისი ქმედებები გატარდება, განხილული იქნება კონკრეტული შემთხვევები და რიგ შემთხვევებში მოხდება დაჯარიმება. ჩვენ მათ არ ვზღუდავთ, უბრალოდ უნდა მოაწესრიგონ დოკუმენტაცია. რაც შეეხება ლოკაციებს, კონტროლი ხორციელდება ქალაქის მასშტაბით ყველა რაიონში, პირველად ეს განვახორციელეთ ვაკე-საბურთალოს რაიონში, რუსთაველის გამზირზე, აბანოების ტერიტორიაზე, მეიდანზე, ლესელიძეზე, ძველ და ახალ პლეხანოვზე. ახლა ვახორციელებთ კიდევ ერთხელ მათ გადაფრთხილებას, მიმართეს თუ არა ამ ობიექტებმა მერიის შესაბამის სამსახურებს. თუ რომელიმემ უკვე მიმართა, მის წინააღმდეგ არ ვიწყებთ საქმის წარმოებას და ველოდებით დოკუმენტაციას. ამ წუთას არც ერთ კაფეზე არ ვიწყებთ საქმის წარმოებას, მაგრამ თუ არ მოაწესრიგებენ დოკუმენტაციას, მათ წინააღმდეგ იქნება გათვალისწინებული საჯარიმო სანქციები", - განაცხადა ბაგრატიონმა.
შეგახსენებთ, რომ თბილისის მერია ღია კაფეების მეპატრონეებს მოუწოდებს დოკუმენტაცია მოაწესრიგონ და ქალაქის იერსახე არ დაამახინჯონ.