ხაშურის მუნიციპალიტეტის სოფელ წაღვლის და წაღვლის ადმინისტრაციულ ერთეულში შემავალი სოფლების მოსახლეობისთვის სამედიცინო აქცია გაიმართა.
როგორც „ინტერპრესნიუსს“ ხაშურის მუნიციპალიტეტიდან აცნობეს, აქცია ხაშურის მერიისა და ვ. ივერიელის სახელობის ენდოკრინოლოგიის, მეტაბოლოგიის და დიეტოლოგიის ცენტრ „ენმედიცის“ მხარდაჭერით მოეწყო.
სამედიცინო ღონისძიება დაავადებათა ადრეულ გამოვლენასა და დროულ და ადეკვატურ მკურნალობას ისახავდა მიზნად. მოქალაქეთა პროფილაქტიკურ გასინჯვებში სხვადასხვა ექიმი-სპეციალისტები მონაწილეობდნენ, მათ შორის, ენდოკრინოლოგი, ბავშვთა ენდოკრინოლოგი, ოფთალმოლოგი, კარდიოლოგი, ნევროლოგი, თერაპევტი, გინეკოლოგი, ოტოლარინგოლოგი, ანგიოლოგი.
ჩატარდა ინსტრუმენტული და ლაბორატორიული კვლევები.