„სამედიცინო კორპორაცია ევექსი“ სამედიცინო აგენტებისა და წამყვან ექიმ-სპეციალისტების 40 კაციან ჯგუფს მასპინძლობს. როგორც „ინტერპრესნიუსს“ „სამედიცინო კორპორაცია ევექსიდან“ აცნობეს, ყირგიზეთის, ყაზახეთის, უკრაინის, რუსეთისა და უზბეკეთის სამედიცინო აგენტები და ექიმები უკვე მეორე დღეა საქართველოს სტუმრობენ და ქვეყანაში სამედიცინო სერვისების პოტენციალს ეცნობიან. ვიზიტის ფარგლებში მათ დაათვალიერეს თბილისში რეგიონული ჰოსპიტალი, კარაპს მედლაინი და ინგოროყვას კლინიკა, ასევე ესტუმრნენ ქუთაისში დასავლეთ საქართველოს სამედიცინო ცენტრს და ონკოლოგიის ცენტრს.
„პოსტსაბჭოთა სივრცის ქვეყნებში მედიცინის კონკრეტული მიმართულებები ყველაზე მეტად საქართველოშია განვითარებული და ფასიც ყველაზე მისაღებია. ყოველწლიურად საქართველოში სამკურნალოდ ჩამოსული ტურისტების რიცხვი სულ უფრო იზრდება, ძირითადი მოთხოვნილება პლასტიკურ ქირურგიაზე, ინ ვიტრო განაყოფიერებაზე, ბარიატრიულ ოპერაციებზე, ტრანსპლანტაციაზე, ონკოლოგიაზე და ოფთალმოლოგიაზეა“, - ნათქვამია გავრცელებულ ინფორმაციაში.