საპარლამენტო უმრავლესობის წევრის ილია წულაიას განცხადებით, თბილისის მიწათსარგებლობის გენერალური გეგმა არამხოლოდ ისტორიული ფაქტია თბილისისთვის, არამედ დროული და საჭიროც.

„დღეს თბილისის მერმა კახა კალაძემ განაცხადა მიწათმოწყობის გენერალური გეგმის მიღების შესახებ. თავისთავად, ეს არა მარტო ისტორიული ფაქტია ჩვენი დედაქალაქისთვის, არამედ დროული და უაღრესად საჭიროც. ჩატარდა დიდი სამუშაო, რომ არსებულ მდგომარეობას მაქსიმალურად მორგებოდა ეს დოკუმენტი, რათა ყოფილიყო რეალური ბაზა იმისთვის, რომ ეტაპობრივად, ჯერ გამოვიდეს ქალაქი ამ ურბანული განაშენიანების ჩიხიდან და მერე განვითარდეს სწორად და უსაფრთხოდ. მოსახლეობის მოლოდინები დიდი იყო გენგეგმასთან დაკავშირებით. იმედი მაქვს, ეს მოლოდინები ჰპოვებს ასახვას დედაქალაქის შემდგომ განვითარებაში. რასაც წლებია ვაფუჭებდით, იმას ორჯერ მეტი წელი დასჭირდება რომ გამოსწორდეს, ახლა საკითხი დგას ასე - უნდა გადავარჩინოთ თბილისი და როგორც მერმა განაცხადა, ეს არის საბაზო მასალა ამის გასახორციელებლად“, - განაცხადა ილია წულაიამ.

საპარლამენტო უმრავლესობის დეპუტატის შეფასებას საქართველოს პარლამენტის პრესსამსახური ავრცელებს.