დღეიდან, საზღვაო კურორტების მიმართულებით მოძრავ, შვეიცარული ფირმის, „შტადლერის“ ორსართულიან მატარებლებში, მგზავრებს სხვადასხვა ტიპის საკვებისა და გამაგრილებელი სასმელების შეძენა შეეძლებათ. როგორც „ინტერპრესნიუსს“ „ საქართველოს რკინიგზის“ პრესსამსახურიდან აცნობეს, საკვები პროდუქტებისა და გამაგრილებელი სასმელების ვენდინგ აპარატები „შტადლერ ქისის“ მოძრავ ვაგონებში უკვე დამონტაჟდა.
„კომპანია Azkoyen მსოფლიოში ცნობილი ბრენდია და ბაზარზე ლიდერის პოზიციაზეა. სწორედ მისგან შეიძინა „საქართველოს რკინიგზამ“ საკვები პროდუქტებისა და გამაგრილებელი სასმელების ვენდინგ აპარატები. რაც შეეხება პროდუქციას, 1 წლის განმავლობაში „საქართველოს რკინიგზას“ საჯარო აუქციონში გამარჯვებული კომპანია „ჯორჯიან ვენდინგ გრუფი“ მოამარაგებს“, - ნათქვამია „საქართველოს რკინიგზის“ მიერ გავრცელებულ ინფორმაციაში.