ხორავას ქუჩაზე მომხდარი მკვლელობის საქმის საგამოძიებო კომისიის წევრის, დეპუტატ ელენე ხოშტარიას განცხადებით, არასრულწლოვანთა გამოკითხვა სპეციალიზირებული ფსიქოლოგის მიერ ისეთ გარემოში ჩატარდება, რომელიც უზრუნველყოფს ინფორმაციის სანდოობას და არასრულწლოვან ბავშვებზე მინიმალურ სტრესს.
“დღეს და ხვალ კომისია არასრულწლოვან მოწმეებს დაკითხავს. არასრულწლოვანთა კოდექსის 29-ე მუხლის მიხედვით, ეს დაკითხვები დახურული უნდა იყოს. ორ დღეში კომისია 3-კაციანი ჯგუფით 3 არასრულწლოვან მოწმეს დაკითხავს. გარდა იმისა, რომ არასრულწლოვანთა კოდექსი ამ გამოკითხვის დახურულობას უზრუნველყოფს, ჩვენი კომისიის ერთსულოვანი გადაწყვეტილებაა, რომ ეს გამოკითხვები უმაღლესი სტანდარტით ჩატარდეს. რადგან გამოკითხვა იმ გარემოში და კომისიის მიერ ამ ბავშვებისთვის დამატებითი სტრესი იქნება. გადავწყვიტეთ გარემოც და გამოკითხვის ფორმაც ისეთი იყოს, რომ ბავშვებისთვის სტრესი მინიმალური იყოს. შესაბამისად, გამოკითხვა სპეციალიზირებული ფსიქოლოგის მიერ ისეთ გარემოში ჩატარდება, რომელიც ერთი მხრივ, ინფორმაციის სანდოობას და მეორე მხრივ, არასრულწლოვან ბავშვებზე მინიმალურ სტრესს უზრუნველყოფს,” - განაცხადა ელენე ხოშტარიამ.