გარემოს დაცვის და სოფლის მეურნეობის მინისტრის მოადგილე - მყინვარის დნობამ გამოიწვია მდინარის დონის მნიშვნელოვანი მომატება, ღვარცოფული და მეწყრული პროცესები

მყინვარის დნობამ გამოიწვია მდინარის დონის მნიშვნელოვანი მომატება, ღვარცოფული და მეწყრული პროცესები, - ამის შესახებ „ინტერპრესნიუსს“ გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა განუცხადა.

სვანეთში დღის მეორე ნახევრიდან კვლავ ნალექია მოსალოდნელი. ნინო თანდილაშვილი აღნიშნავს, რომ უწყების შესაბამისი სამსახურები ადგილზე რჩებიან.

„ადგილი ჰქონდა მყინვარის დნობას, რამაც გამოიწვია მდინარის დონის მნიშვნელოვანი მომატება, ღვარცოფული და მეწყრული პროცესები, როგორც მდინარე ნენსკრაზე, ასევე მის ყველა შენაკადზე. დღის მეორე ნახევარში ველოდებით ნალექს, თუმცა არა იმ ოდენობით, რაც გუშინ იყო. ისეთი მასშტაბებით სტიქიის განმეორებას არ ველოდებით, თუმცა მდინარის დონე კვლავ მომატებულია. ჩვენ ვრჩებით ადგილზე“, – განაცხადა ნინო თანდილაშვილმა.