იზმირისა და სტამბოლის პროკურატურამ ფეთჰულაჰ გიულენის ორგანიზაციასთან კავშირის გამო, 346 პირის დაკავების ორდერი გასცა. ამის შესახებ თურქული საინფორმაციო სააგენტო „ანადოლუ“ იუწყება. მისივე ინფორმაციით, დასაკავებელ პირებს შორის ყოფილი და მოქმედი სამხედროები არიან.

271 პირის დაკავების ორდერი სტამბოლის პროკურატურამ გასცა. მათ შორის არის 122 მოქმედი სამხედრო, 120 კურსანტი, 29 დათხოვილი სამხედრო.

ოპერაცია თურქეთის 47 პროვინციაში ტარდება.

იზმირის პროკურატურის მიერ სანქცირებული ოპერაცია 30 პროვინციაში ტარდება. იზმირის პროკურატურამ 75 პირის დაკავების ორდერი გასცა, მათ შორის 59 მოქმედი სამხედროა.

თურქეთში სახელმწიფო გადატრიალების მოწყობა მეამბოხეთა ჯგუფმა 2016 წლის 16 ივლისის ღამეს სცადა. ძირითადი დაპირისპირება ანკარასა და სტამბოლში მიმდინარეობდა. დაიღუპა 240-ზე მეტი და დაიჭრა 2 000-ზე მეტი ადამიანი. ოფიციალურმა ანკარამ სახელმწიფო გადატრიალების მოწყობაში ოპოზიციონერი მქადაგებელი ფეთჰულა გიულენი დაადანაშაულა. აშშ-ში მცხოვრებმა გიულენმა კი გადატრიალების მცდელობა დაგმო და ყველა ბრალდება უარყო.