მარნეულის მუნიციპალიტეტის მერის მოვალეობის შემსრულებელი ზაურ ტაბატაძე მარნეულელ წარმატებულ სპორტსმენს, ლუკა კაპანაძეს შეხვდა, რომელმაც ევროპის ჩემპიონატზე ძიუდოში კადეტთა შორის მესამე ადგილი დაიკავა და ბრინჯაოს მედალი მოიპოვა.

როგორც „ინტერპრესნიუსს“ მარნეულის მუნიციპალიტეტიდან აცნობეს, შეხვედრას ეწრებოდნენ მერის მოადგილე ლაშა ლობჯანიძე, საკრებულოს თავმჯდომარის მოადგილე ამირან გიორგაძე, მარნეულის სპორტული სკოლის დირექტორი იაგო ნავერიანი, მერიის თანამშრომლები და მწვრთნელები.

მერის მოვალეობის შემსრულებელმა ლუკას მიღწეული შედეგი მიულოცა და წარმატებები უსურვა.

„აღნიშნული ჩემპიონატი ძიუდოში 2018 წლის 28 ივნისიდან - 1-ელ ივლისამდე, ბოსნია-ჰერცოგოვინაში ჭაბუკ სპორტსმენთა შორის მიმდინარეობდა, რომელშიც მონაწილეობდა საქართველოს ძიუდოისტთა ნაკრები გუნდი. ორი სპორტსმენი, ბექა წიფიანი და ლუკა კაპანაძე ჩემპიონატზე მარნეულის მუნიციპალიტეტის სპორტულ სკოლას წარმოადგენდნენ. ლუკა კაპანაძე, რომელიც 66 კგ წონით კატეგორიაში ასპარეზობდა, გადამწყვეტ ორთაბრძოლაში ავსტრიელ ძიუდოისტს, სამუელ გასნერს დაუპირისპირდა. მარნეულელმა სპორტსმენმა მოწინააღმდეგე დიდი უპირატესობით დაამარცხა და ევროპის ჩემპიონატის ბრინჯაოს მედალოსანის სტატუსი მოიპოვა,“ - ნათქვამია ინფორმაციაში.