მე დავით უსუფაშვილს ტელეფონით ვესაუბრე, ჩვენ ერთმანეთს ნატო-ს სამიტის შემდეგ შევხვდებით, - ამის შესახებ საქართველოს პრეზიდენტმა გიორგი მარგველაშვილმა გუშინ ჟურნალისტებს განუცხადა, რითაც გამოეხმაურა “შენების მოძრაობის“ ლიდერის, დავით უსუფაშვილის შეთავაზებას. პრეზიდენტის თქმით, ის წერილის სულისკვეთებას „ვითარების შეფასების“ ნაწილში იზიარებს.

„მე გავეცანი ამ წერილს. შემიძლია მოგახსენოთ, რომ წერილში ძირითად სულისკვეთებას ვითარების შეფასების ნაწილში ვიზიარებ. აგრეთვე მინდა გითხრათ, რომ ეს წერილის ერთი ნაწილია. შემდეგაა კონკრეტული ნაბიჯები, თუ რა შეგვიძლია გავაკეთოთ და როგორ შეგვიძლია ჩვენს ქვეყანას ვემსახუროთ მეც, ბატონი დავითიც და სხვა პოლიტიკური ლიდერებიც. ამის თაობაზე მე გუშინ დავით უსუფაშვილს ტელეფონით ვესაუბრე. ჩვენ შევხვდებით ერთმანეთს სწორედ სამიტის მერე“, - განაცხადა გიორგი მარგველაშვილმა.

დავით უსუფაშვილმა გიორგი მარგველაშვილს ღია წერილით მიმართა და საპრეზიდენტო არჩევნებისთვის გაერთიანება შესთავაზა.